Nagahingyo ang general manager sang Central Negros Electric Cooperative, Inc. sa mga member consumers nga indi magpatigayon sang illegal tapping matapos isa sa mga line man sang CENECO ang nadulaan sang kabuhi bangud sa nasambit nga illegal nga aktibidad.
Sa interview sang Bombo Radyo kay Atty. Danny Pondevilla, ginpahayag sini nga ginakasubo sang CENECO ang kamatayon ni Regie Austria, 25 anyos, matapos makuryente sa isa ka poste sang Pebrero 7.
Suno kay Pondevilla, Dominggo sang kagaahon sang may nabaton sila nga tawag nga brown our sa Sta. Maria, sa Talisay City.
Apisar nga tubtob alas 12:00 sang kaagahon lang ang duty ni Austria, iya ini ginrespondehan kag ginpahayag nga tapuson na lang bangud tuman ini kapisan.
Kaupod ang isa pa gid ka line man, nagpadulong si Austria sa lugar kag nakit-an nga may buka nag insulator sa linya.
Bangud nga kampante sila nga wala sang power, apisar nga madulom nagsaka ini sa poste agud islan kuntani ang insulator nga nabuka apang wala ini nakahibalo nga may yara sang wire halin sa illegal tapping nagikan sa pihak nga linya halin sa isa ka subdivision.
Suno kay Pondevilla, natandog ni Austria ang wire gani nakuryente ini kag nadagdag sa poste.
Ginhingagaw pa ini dala sa ospital apang gindeklarar na nga dead on arrival.
Ginakasubo sang general manager ang natabo bangud isa ka semana pa lang nga nagregular ang 25-anyos sa trabaho kag siya ang ginasaligan sang iya pamilya.
Nagpasalig naman ini nga magahatag sila sang bulig pinansyal kag indi pagpabay-an ang pamilya sang biktima.
Ila naman ginpablotter ang insidente kag nagmando sa area manager nga maghatag sang incident kag investigation report agud mahatagan sang hustisya ang line man nga nadisgrasya.
Nagpangabay man ini sa mga member consumer nga indi magresort sa illegal tapping bangud kabuhi sang mga empleyado ang yara sa ital-ital kag nagalaom nga mangin leksyon na ini agud indi na mag-ubra sang illegal nga aktibidad.
