Nagapadayon pa ang imbestigasyon sang kapulisan tuhoy sa identity sang mga suspetsado nga nagluthang-patay sa isa ka lalaki nga nagabaligya sang inasal sa Silay City sang Martes sang hapon.
Madumduman nga dead on the spot si Ronald Suating matapos ginluthang sang wala pa makilal-an nga mga persona nga ginaalegar nagasakay sa motorsiklo pasado alas 5:00 sang Martes sang hapon sa Zone 5, Barangay Mambulac, Silay City.
Si Suating ang nagabaligya sang inasal sa atubangan sang isa ka tiyange sang siya ang ginluthang.
Nakaangkon ini sang lima ka igo sa ulo kag likod nga gintunaan sang iya kamatayon.
Narecover sa crime scene ang anum tanan ka slug sang .45 calibre pistol.
Sa interview sang Bombo Radyo kay Police Lt. Guilmor Cuare, deputy chief of police sang Silay City Police Station, aminado ini nga mabudlay makilal-an ang mga suspetsado bangud sila ang nagaface mask.
Indi pa man suno sa iya makahambal kun may kaangtanan sa illegal nga druga ang motibo sang krimen apisar nga napriso sa New Bilibid Prison sa Muntinlupa sang 2011 ang biktima kag sang tinalikdan nga Hulyo 2020 lang nakagwa.
Suno kay Cuare, may mga spekulasyon man nga nagalapta sa mga kaingo sini apang indi pa nila ini makumpirmar bangud lunsay man lang mga alegasyon.
Suno sa iya, wala sang CCTV sa lugar gani magapangita sila sang mga establishmento nga malapit sa crime scene may CCTV footage.
Sa karun, suno sa deputy chief of police, ginahulat pa nila ang resulta sang ballistic result sa SOCO.
