Isa ka adlaw antes ang Valentine’s Day, pilo gid ang ginsaka sang presyo sang mga bulak nga ginabaligya sa likod sang BAYs Center sa ciudad sang Bacolod.
Suno kay Carlos Redobles, flower vendor, ginpahayag sini nga sugod sang Pebrero 8 sang nagsaka ang presyo sang mga bulak.
Ang isa ka stem sang red kag pink roses ang nagabili sang P70 samtang P100 naman ang isa ka stem sang white rose.
Nagabalor naman sang P250 per stick ang paper rose kag nagadangat ini sa P500 kun himuon nga boquet.
P50 naman ang isa ka stem sang carnation santang P70-P80 kun iwrap.
P500 naman ang per stick sang star gazer.
Nagadangat naman P250 ang isa ka stem sang sun flower kag P500 kun may wrapper.
Suno kau Redobles, halin sa Cebu kag Baguio ang ginabaligya nila nga bulak.
Indi naman ini makapat-od kun san-o magabulubarato ang presyo sang mga bulak bangud nagadepende sila sa ginahatag nga presyo sang mga supplier.
Ginalauman naman sang room boy sa isa ka motel sa ciudad sang Bacolod nga magadamo ang kustomer sa Valentine’s Day sa Domingo.
Sa interview sang Bombo Radyo kay Bobet, indi magsaka ang rate sang room sa Pebrero 14 kundi magapabilin ang kinaandan nga P320 para sa deluxe kag P400 para sa VIP sa una nga tatlo ka oras kag dugang nga P100 sa kada masunod nga oras.
Aminado si Bobet nga nagnubo ang income sang nagsugod ang COVID pandemic apang amat-amat na nga nagbalik ang mga kustomer sang ginhalugan ang quarantine status.
Ila man ginpasiguro nga wala ginapahanugutan ang mga menor de edad nga magsulod sa motel kun sa diin ginabalibaran ang mga ini bisan magpakilala pa nga legal na ang edad.
Suno kay Bobet, ginalauman na ang pagdamo sang mga kustomer sa Valentine’s Day apang bangud 26 lang ka rooms ang yara sa ila, masami ini nga fully-booked.
