Nagapanindugan ang lima ka barangay kagawad sa Brgy. Tangub nga indi sila magpirma sa mga resolusyon agod maswelduhan ang ila mga job order kon indi mahatag ang ila ginapangayo nga kopya sang payroll, mapakita ang actual nga numero sang mga empleyado kag makatambong sila sa pag-release sang sweldo.
Sa interview sang Bombo Radyo kay Barangay Kagawad Joan Sonota, ginpahayag sini nga ang kapitan ang nagaappoint sang mga Job order nga nagustuhan sini .
Suno kay Sonota may yara sang 91 ka mga job orders ang barangay kag nakapirma pa sila sang resolusyon para sa bayad sang mga job order sang Disyembre apang sang Enero wala na sila nagpirma bangud sa nagakabatian nga irregularidad sa pagbayad sa mga JO’s sang barangay.
Suno pa diri, ginahalungan lang nila ang ila nga pirma gani wala sila nagpirma bangud sa ila nabatian nga mga reklamo sang mga JO sang barangay.
Ginpahayag ni Sonota nga ang ila reklamo batok sa mga opisyal sa Office of the Presidente kag Criminal Investigation and Detection Group (CIDG) bangod sa gina-alegar anomaliya sa payroll sang mga JO sa diin ang sweldo/allowance kada bulan ang 500 pesos lang apang sa ila gin-pirmahan nga payroll ang ila sweldo amo ang 2500 pesos kada bulan.
Ginpahayag ni Sonota nga kon mahatag sang barangay ang ila ginahingyo, pirmahan man nila ang mga resolusyon agod mapirmahan na ang mga JO.
Ginpamangkot man nila sa karun kun sa diin nagkadto ang kwarta nga wala nahatag sa mga JO bilang sweldo.
Una naman nga ginpahayag ni Punong Barangay Noli Villarosa nga ang barangay treasurer kag committee on finance ang nakahibalo sang mga butang nahanungod sa kwarta kag wala diri kaangtanan ang punong barangay.
