Napadala na sa Regional Joint Security Control Center (RJSCC) ang na-identify sang COMELEC nga 13 tanan ka mga lugar sa Negros Occidental bilang areas of concern para sa palaabuton nga May 9, 2022 elections.
Sa interview sang Bombo Radyo kay Provincial Election Supervisor Atty. Roberto Salazar, may tatlo ka category ang pag-identify sa isa ka lugar nga yara sa immediate area of concern.
Suno kay Salazar natunga sa tatlo ka category ang areas of concern kag ini ang Category 1 ukon may intense political rivalry sang mga kandidato, Category 2 areas of immediate concern ukon ang may presensya sang communist terrorist group kag private armed groups kag category 3 ang areas of grave concern ukon may intense political rivalry; may presensya sang communist terrorist group kag private armed groups ukon kombinasyon sang category 1 kag 2.
Sa karun, ginpaidalom sa category 1 ang banwa sang Salvador Benedicto.
Ang category 2 naman ang ginalakipan sang banwa sang Manapla, syudad sang Silay; Victorias, banwa sang Toboso, Binalbangan, Himamaylan City, Kabankalan City kag banwa sang Hinobaan.
Samtang, nalakip sa Category 3 ang banwa sang Candoni; Moises Padilla kag syudad sang Escalante.
Sa karun ginahulat na lang sang probinsya ang rekomendasyon sang RJSCC sa mga ginpasa nga 13 ka lugar sa probinsya sang Negros Occidental sa areas of concern kag ginabantayan bangud mahimo nga may magbag-o pa.
Ginpahayag man ni Salazar nga nagpasalig ang PNP kag ang AFP nga kontrolado nila ang peace and order sa nasambit nga lugar.
Samtang ang provincial office sang Commission on Elections sa probinsya sang Negros Occidental ang nagapatigayon sang refresher sa election board inspectors.
Nahibaluan nga ang mga board of election inspectors ang nagafacilitate sa adlaw sang piniliay.
