Ginpanugyan sang Alkalde sa banwa sang Cauayan, Negros Occidental nga indi na pagliwaton ang natabo sa Brgy Tomina kun sa diin ginpasulod sang Punong Barangay ang iya duha ka mga kabataan sa Presidential Scholarship.
Ginkilala ang Punong Brgy nga si Evelyn Robles sang Barangay Tomina sa banwa sang Cauyan.
Sa interview sang Bombo Radyo kay Cauayan Municipal Mayor John Rey Tabujara, ginpahayag sini nga wala siya nakahibalo angot sa isyu bangud wala man sang may nagreport sa iya.
Nakibot na lamang ini sang naglapta na social media ang amo nga isyu.
Suno sa Alkalde, wala man nakabutang nga bawal magpasulod sang bata sang isa ka Kapitan kun ini ang qualified man lang apang suno sa iya, ‘out of delikadesa’ nalang kuntani bangud suno diri, indi man tanan nga tawo ang makahangop sa sitwasyon.
Paathag ni Tabujara, ang P200,000 nga assistance sa idalom sang sang Bawat Barangay Makikinabang Program (BBMP) ang wala nag-agi sa ila bangud ang pondo ang direkta na nga ginhatag sa Brgy.
Gani suno diri, ang discretion sang pagpanatag ang yara na sa bgry kag sila na ang magapili sa lima ka scholars nga kwalipikado nga makabaton sang P20,000.
Dugang pa, may lain man nga ginahatag ang LGU nga educational assistance.
Suno diri, wala pa nakakadto ang nasambit nga Punong Brgy sa iya opisina bangud posible nga ini ang nahuya.
Panugyan sini nga apisar nga nagakinahanglan man sang assistance ang isa ka opisyal sang Brgy dapat hatagan gid sang prayoridad kag unahon ang mga constituent kag indi ang mga kakilala lang ukon kaparyentehan.
