Aminado ang kaupod sang mga nalumos nga wala ini sang impormasyon nga indi mahimo nga paliguan ang Cabilang-bilangan Reef sa Barangay Sicaba, Cadiz City, Negros Occidental.
Sa interview sang Bombo Radyo Bacolod kay Alex Simon, isa ka friendly outing ang ila ginpatigayon kaupod ang pamilya sang mga katrabaho sini.
Suno kay Simon, nag-arkila sila sang pumpboat kag amo ang nagdul-ong sa ila padulong sa tower nga nahamtang sa tunga sang Cabilang-bilangan Reef kahapon sang aga.
Suno diri, duha sila ka batch nga nagpadul-ong sa lugar sakay sa gin-arkilahan nga pumpboat.
Sang nagpadulong sila sa lugar, wala sang problema apang nagkaproblema lamang sang hapon na mga ala-1:00 tubtob ala-1:30 ang takna sa hapon bangud nagbaskog na ang current sang tubig.
Suno kay Simon, una nga nalumos ang bata sang kaupod nila sa trabaho nga 15 anyos apang ginrescue siya sang kaupod nila sa trabaho.
Apang matapos ang ginhimo nga rescue, may nabatian ini nga nagapangayo sang tabang kun sa diin ginkadtuan sang ila kaupod nga si Remymar Ocon kag naglangoy man si Marlyne Aguirre padulong sa nagpangayo sang tabang.
Suno kay Simon, tuman ka dasig sang hitabo kun sa diin nagbulagay na ang apat tubtob nga nagsinggitan na ang iban nila nga mga kaupod nga nalumos na kag amat-amat nga nagalugdang ang apat ka mga biktima.
Samtang ang kaupod naman nila nga si Lyca Cuelo, 26 anyos nga nag-upod man kuntani sa pagsalbar sa nalumos nga bata ang nakasurvive sa bulig sang ginhaboy sang mga ini nga plastic bottles.
Suno kay Simon, didto sila nagpwesto sa idalom sang tower bangud indi man sila makahibalo maglangoy kaupod ang iban nga mga bata.
Suno diri, sang nalunod na ang mga biktima gintinguhaan nila nga mapunggan ang mga bata nga maglumpat nagikan sa tower.
Ginpahayag man ni Simon nga ang ila napuestuhan ang pinakahilway nga lugar bangud wala ini nalab-ot sang mabaskog nga current sang tubig.
Aminado man si Simon nga wala siya nakahibalo nga ginadumilian ang paglangoy sa lugar bangud indi man ini tumandok sang syudad sang Cadiz.
Suno diri, kun nakahibalo lamang ini, bilang manager sang kompaniya nga ila ginatrabahuan wala na sini ginpadayon pa ang ila outing sa lugar.
Ginkasubo man sini ang natabo sa mga biktima ilabi na sa mag-iloy bangud malapit ini sa iya matapos nga makaupod niya ang mga ini sa boarding house sa sulod sang pila ka bulan.
