Aminado ang isa ka tricycle driver sa Barangay Singcang Airport, Bacolod City nga lunsay sa ila asosasyon ang nakapasa na sang requirements para sa fuel subsidy nga ihatag sang city government paagi sa ordinansa nga gin-aprubahan sang Sangguniang Panlungsod.
Sa interview sang Bombo Radyo Bacolod kay Michael Tapang, ginahulat nalang nila sa karun kun san-o ang petsa nga ipanagtag ang fuel subsidy.
Suno kay Tapang, maayo man kun mag-abot ang ayuda pasalamatan nila apang kun indi wala man sila sang mahimo.
Ginpahayag man sini nga sa karun maayo man ang biyahe apang ang problema sang mga ini ang mga nagabiyahe nga strikers.
Suno kay Tapang, may nagasaway man sa mga strikers nga enforcer kasubong man ang ila nga sergeant at arms sang asosasyon apang nagadamo man sagihapon.
Samtang nagsaka naman nga presyo sang produktong petrolyo wala naman ini sang mahimo kundi agwantahon kag sundon bangud matughong man sila sagihapon agud nga makabiyahe bangud ini lamang ang ila nga pangabuhian.
Samtang, ginpahayag man sang isa ka tricycle driver nga nagabiyahe sa Barangay Sincang Airport, Bacolod City nga nakatapos na sila sa pagparehistro sa makabaton sang ayuda nagikan sa syudad sang Bacolod apang pasalamatan man sini kun mag-abot gid man.
Suno kay Francisco Ugdiman, maayo gid kun mabaton nila ang ayuda bangud dako man ini nga bulig sa ila.
Ginpahayag man sini nga wala man sila sang mahimo sa nagasaka nga presyo sang produktong petrolyo kundi magpadayon lang sa pagbyahe agud nga may yara sang income.
