Ginarespeto ni Police Major Junji Liba ang opinyon ni Councilor Al Victor Espino tuhoy sa proposal sini nga pagpahalin sa iya bilang pinuno sang Bacolod Traffic Authority Office (BTAO) kag pagarespetuhon man ang mangin desisyon ni Mayor Alfredo Benitez.
Sa interview sang Bombo Radyo kay Liba, gin-athag sini nga wala siya sang ideya sa ginaalegar nabaton nga text message ni Espino nga ginlaragway sini bilang “pagpamahog” nga indi pagtandugon si Liba kag mangin siya ang nakibot sang nabatian sini ang issue.
Suno sa BTAO Head, entitled man si Espino sang iya opinion apang ang pag-assign sa iya bilang pinuno sang Bacolod Traffic Authority Office ang wala sini gin-applyan kundi ini ang ginsalig sa iya nga ubrahaon.
Suno pa diri, wala ini sang may nahibaluan nga layi nga nagadumili nga uyatan sang isa ka pulis ang BTAO.
Suno kay Liba, madamo na sang instances nga gin-uyatan ini sang isa ka pulis kag wala man sang may nagpamatok.
Sang tinalikdan nga tuig, suno sa iya, may resolution nga nagahatag sang otoridad kay anay BTAO Head Police Major Ruel Culanag bilang traffic enforcement sa ciudad kag mangin si Espino ang isa man sa mga nagpabor diri gani siya ang nasurprisa ngaa ginkwestiyon ang iya pagpungko bilang BTAO Head.
Apang suno diri, iya pagarespetuhon kun ano man ang mangin opinion kag desisyon sang alkalde.
