Nakareply na ang Bacolod City Water District sa ginrefer ni Mayor Alfredo Benitez nga mga reklamo sang mga pumuluyo angot sa tubig.
Sa interview sang Bombo Radyo kay BACIWA general manager Mona Dia Jardin, 201 respondents ang nagrespond sa QR code nga ginpagwa ni Benitez kag ini ang gilayon nga ginforward sa Prime Water bangud sila ang in-charge sa operation.
Suno kay Jardin, ginplastar nila sa reply ang actions taken sa mga reklamo paagi sa reply nga ginpadala sa opisina ni Secretary of the Mayor Atty. Joseph Chiu.
Nagikan sa 201, 40 ang nagdoble apang kalabanan nga reklamo ang angot sa malubog nga tubig kag kulang ang tubig.
Suno kay Jardin, ginaako sang BACIWA nga indi tanan nga concessionaires ang makabaton sang bastante nga supply bangud kulang ang supply sa karon.
Suno diri, nakahibalo na ang water district sang common nga mga reklamo apang ginawelcome nila ang inisyatibo sang alkalde.
Ginkumpirmar sang general manager nga problema sang BACIWA ang kulang nga source sang tubig, turbidity kag kulang ang supply kada adlaw gani nagareklamo ang mga concessionaires apang nagahimo na sila sang tikang angot diri kaangay sang pagkuha sang supply sa Murcia Water District.
