Nagpanawagan ang Kabankalan City Police Station sa mga babayi nga naka-encounter sang harrassment ukon indi maayo nga sugilanon nagikan sa driver sang ginasakyan nga tricycle nga ireport gilayon sa police station sa baylo nga ipost lang ini sa social media.
Ini ang kasunod sang post sang isa ka pasahero tinalikdan nga adlaw nga nagpangihi ang driver sang tricycle apang wala niya nasirado ang zipper pagbalik sa tricycle.
Suno kay Police Lt. Jomel Salarda, deputy chief sang Kabankalan City Police Station, halin sa Southland ang babayi kag mapadul-ong sa Gaisano apang ginaalegar nga nagpundo ang driver sa kahilamunan agud nga magpangihi apang bukas gihapon ang iya nga zipper sang nagbalik sa tricycle.
Suno sa deputy chief, nagpadulong man ang babayi sa mall agud nga maglagaw sa baylo nga magreklamo sa police station pagkatapos nga natabo ang iya alegasyon.
Nakig-angot ang imbestigador sa babayi nga kun mahimo, mapadulong ini sa police station apang wala man nakasipot.
Makaligad ang pila ka adlaw, nagpadulong ini sa police station agud nga magkuha sang police clearance.
Diri ini gin-istorya sang personnel kun ano ang matuod nga natabo apang indi man ini luyag nga magreklamo batok sa driver.
Suno sa babayi, ginpahilot lang sini ang iya nga bali matapos nga maglumpat sa motorsiklo.
Suno kay Salarda, mahimo nga luyag lang sang babayi nga magpost sa social media apang indi man sini luyag nga magfile sang reklamo.
Mismo si Salarda ang personal nga nakig-angot sa babayi apang wala ini nakareply kag wala man nagasabat sa tawag.
Bangud sini, nag-abiso si Salarda sa mga babayi nga maka-encounter sang kaangay sini nga sitwasyon nga magpadulong sa police station agud makahimo sang nagakaigo nga tikang.
