Magapatigayon sang public hearing sa session hall sang City Council sa masunod nga semana angot sa reclamation nga ginapatigayon ni Bacolod City Councilor Vladimir Gonzales sa Barangay Bayanihan, Barangay Banago.
Madumduman nga nangin mainit ang public hearing nga ginpatawag sang Barangay Council sang Banago angot sa nasambit nga issue kahapon.
Sa interview sang Bombo Radyo kay Councilor Gonzales, ginwelcome sini ang oportunidad nga nakapatigayon sang public hearing kahapon agud maathag sa publiko kun ano gid nga issue ang ginaalegar ni Punong Barangay Ricky Mijares.
Suno kay Gonzales, bangud nga ang pihak nga kampo ang nag-organisa sang public hearing, sila ang may kontrol diri gani iya na gin-antisipar nga ang mga mamangkot lamang amu ang ila mga ginpanghakot.
Suno sa konsehal, preparado man ini kag nagdala mismo sang iya kaugalingon nga microphone kag speaker bangud luyag sini nga ang tanan ang mabatian.
Suno diri, iya ginpaathag sa publiko nga nag-agi ini sa due process kag santo sa mga abogado nga iya ginpamangkutan, indi na kinahanglan sang resolution of no objection (RONO) nagikan sa barangay bangud reclamation ang iya ginapatukod kundi development sa iya pribado nga propedad apang bangud nagsulat si Mijares sa Sangguniang Panlungsod kag bilang respeto na lamang, ginpresentar sini ang mga papeles kag titulo.
Suno diri, wala sang otoridad ang punong barangay bangud indi na kinahanglan magkuha sang RONO nagikan diri.
Suno sa iya, damo pa kuntani ang luyag nga mamangkot apang ginapunggan sang kampo sang barangay council kag nagpalagyo si Mijares.
Suno diri, magapatigayon liwat sang hearing sa Sangguniang Panlungsod sa masunod nga semana kag indi manago si Mijares kag makapamangkot ang mga timalambong sang direkta.
Suno sa iya, paga-imbitahan ang bilog nga city council kag mga pumuluyo sang Barangay Banago nga apektado.
