Wala sang narecord nga ashfall kag baho sang asupre sa ciudad sang Canlaon, Negros Oriental kasunod sa paglupok sang Bulkan Kanlaon, alas-12:46 kahapon sang udto.
Suno kay Seth Baraga, Canlaon City Public Information Officer, normal ang sitwasyon sa ciudad kag wala man sang may gin-evacuate.
Suno kay Baraga, ulihi nga nagpatigayon sang evacuation ang ciudad sang Disyembre 9, 2024 sang ginpasaka sa Alert level 3 ang Bulkan Kanlaon.
Pahayag sini nga sa paglibot sang CDRRMO sa lugar, wala sang narecord nga nahalitan nga establisyimento kag mga pananum.
Ginapanugyanan sini ang mga pumuluyo ilabi na ang yara sa sulod sang 4km permanent danger zone nga maghalong kag mag-aligmat.
Sa subong, ginpahayag ni Baraga nga ginabantayan sang mga otoridad ang posible nga pag-ulan nga mahimo makatuga sang lahar flow.
Samtang, ginpasiguro naman sini nga handa ang LGU kag nakastandby ang ila mga personnel sa anuman nga posible nga emerhensya.
