Tatlo sa apat ka mga persona nga ginhingyo sang Bacolod City Government sang consultancy service ang mga empleyado sang Negros Occidental Provincial Capitol.
Sa Correspondence No. 11-22-0394, may ginpropose nga consultancy agreements sa tunga sang Bacolod City Government kag kay Atty. Rayfrando Diaz nga mangin Consultant for Administrative Matters and Systems Review; Atty. Valerie Anne H. Hollero bilang Consultant for Health Insurance and Health Care; Dr. Mary Ann P. Maestral bilang Consultant for Health and Hospital Concerns; kag Ms. Lucille Gelvolea bilang Consultant for Special Projects and Economic Affairs.
Si Diaz ang sa karun ang nagaserbi bilang Provincial Administrator; si Hollero naman ang anay regional Vice President sang Philippine Health Insurance Corporation 6; si Maestral ang chief of hospital sang Teresita Lopez Jalandoni Provincial Hospital; kag si Gelvolea ang sa Economic Enterprise Development Department (EEDD).
Suno kay Provincial Administrator Atty. Rayfrando Diaz, aminado ini nga makapoy bangud madugangan ang ila trabaho apang ila pagabatunon ang hangyo ni Mayor Alfredo Benitez kag sila ang magasuporta.
Suno kay Diaz, kun ano ang naimprove sa Kapitolyo, kun luyag nga i-adapt sang Bacolod, handa gid sila nga magbulig.
Kun magset-up naman suno sa iya kag maimplementar na sang maayo kaupod ang proper supervision nagikan sa masaligan nga tawo sa city government kag indi na kinahanglan ang ila serbisyo, sarang na sila nga makauntat.
Gin-athag man sini nga consultancy services lamang ang ila igahatag kag indi sila ang direkta nga magapamuno ukon magagiho.
Suno diri, ang ila serbisyo ang pro-bono kag wala sang sweldo nagikan sa city government.
Ginhatagan man sila ni Governor Eugenio Jose “Bong” Lacson sang authority to practice nga sarang sila makapangita sang trabaho magluwas sa probinsya kag may pahanugot naman nga makahatag sang serbisyo sa ciudad sang Bacolod.
