Gin-abisuhan sang chairman sang Committee on Market and Slaughterhouse sa Sangguniang Panlungsod sang Bacolod ang mga tenants sa Manokan Country nga magpadulong sa City Treasurer’s Office subong nga adlaw agud makadihon nga agreement kun sarang nga ma-extend ang deadline sang ila arrears sa bulan sang Disyembre.
Subong nga adlaw, Setyembre 30, ang deadline nga ginhatag sang city government sa mga tenants agud makabayad sang ila mga arrears.
Suno kay Councilor Celia Flor, sa pagtsekyar sini sang collection, kapin P1.3 million na ang kabug-usan nga nakolekta sang ciudad nagikan sa mga tenants kag tatlo na ang nakafully paid.
Suno kay Flor, nakameeting na sila kaupod ang local market committee kag City Legal Office kag nahisugtan nga kun magpadayon ang movement sang collection sa arrears, posible nga ma-extend ang deadline.
Suno sa iya, subong nga adlaw, maga-assess ang City Legal Office kag kun makit-an nga dako ang nabayad sang isa ka tenant, dako ang posibilidad nga ini ang mapabilin kag indi magsirado subong nga adlaw.
Kun ma-assess naman nga indi klaro kag wala sang sinceridad sa pagbayad ang isa ka tenant, may posibilidad nga ini ang magasirado.
Suno diri, ini ang nagapakita lamang nga seryoso ang ciudad sa pagkay-o sang Manokan Country.
