Gin-athag sang management sang Bacolod City Water District nga wala ini nagasiling nga apat lang ka barangay sa ciudad ang may kulang nga supply sang tubig.
Sa interview sang Bombo Radyo kay BACIWA General Manager Mona Dia Jardin, ginpakita sa iya ni Mayor Alfredo Benitez ang record sang tanan nga reklamo nga iya nabaton matapos maglunsyar sang citizens water watch.
Ang pinakamadamo nga reklamo nga nabaton ni Benitez ang nagikan sa mga residente sa south nga bahin sang Bacolod nga ginalakipan sang Mansilingan, Pahanocoy, Handumanan kag Felisa kag kalabanan nga reklamo sang mga ini ang kakulang sang tubig.
Suno kay Jardin, wala niya ginahambal nga apat lang ka barangay ang may kulang nga tubig bangud aminado ini nga halos tanan nga barangay ang ginakulang sang supply.
Suno diri, wala niya ginadeny nga may kakulang sang supply sang tubig.
Sang damlag lang, ginrescind sang BACIWA ang kontrata sa Bacolod Bulk Water Incorporated sa injection point number 2 apang ginbalik sang Office of the Government Corporate Counsel sa Board of Directors ang pagdesisyon kun irescind ang kontrata ukon indi.
Ginpahayag naman sang Bacolod Bulk Water Incorporated nga nasolbar na ang problema nila sa right of way kag handa na ang mga ini nga magsupply sang tubig.
Bangud sini, makakuha na ang BACIWA sang dugang nga supply sa Murcia Water District kag BBWI.
Suno sa BBWI, tinguhaan nila nga makaligad ang anom ka bulan, makasupply na sila sang 15 million liters per day nga dugang sa ginasupply sa karon sang injection point number 1.
Suno diri, kun himuon sang BBWI ang ila nga bahin, madugangan sang 10 million tubtub 15 million liters per day ang water supply sa sulod sang apat tubtub anom ka bulan.
