Ginalantaw naman ni Carbon nga maayo nga kahigayunan ang Masskara Festival agud nga makasulod ang madamo nga mga turista partikular na ang mga Foreign Tourists.
Paathag sini nga dako nga butang ang pagsulod sang mga foreign tourists bangod dolyar ang ila nga kwarta nga makabulig sa pagkabuhi sang mga palangitan-an.
Dugang pa sini nga umpisa palang ang Masskara Festival subong nga Oktobre kag madugangan pa ang pagsulod sang kwarta sa masunod nga mga binulan tubtob sa Desyembre kadungan sa pagrelease sa mga 13th Month Pay.
Paathag ni Carbon nga sila ang ginbutang agud magbantay sa bahin sang negosyo sa syudad.
Sa pagsulod sang mga turista, ginalantaw sini nga mabuhi ang madamo nga mga negosyo kalakip na ang mga trisikad kag tricycle driver kag iban pa.
Nagalaom si Carbon nga magdangat sa 400 tubtob 500 million ang magatiyog nga kwarta indi lang sa Negros Occidental kundi kalakip na ang bilog nga Western Visayas.
Suno diri, ang mga turista ang nahidlaw na sa paglibot gani matapos ang pagpadulong sa syudad sang Bacolod para sa Masskara Festival, ang mga ini ang magalibot pa sa iban nga mga tourist attraction sa Western Visayas.
Pinaagi sini, linibo ang mahatagan sang trabaho.
Nagakoordinar man ang tanan nga mga opisina sang Department of Tourism (DOT) sa bilog nga Region 6 agud nga mahimuan sang paagi nga magpabilin pa sang malawig kag maggastos sa madamo nga mga butang ang mga turista.
