Ginatugyan na sang Superintendent sa Department of Education (DepEd) division of Himamaylan City sa alkalde sang syudad ang desisyon kun san-o ibalik ang klase sa mga lugar nga apektado sang nagaluntad nga engkwentro sa tunga sang militar kag rebelde nga New People’s Army sa Barangay Carabalan, Himamaylan City.
Suno kay Gladys Amylaine Sales, indi makapadulong sa mga affected areas ang mga manunudlo kag school heads bangod restricted ini sang militar, apang nagapadayon ang ila monitoring.
Nagapati naman ini nga ang desisyon ni Himamaylan City Mayor Raymund Tongson Jr nga may kaangtanan sa klase sa mga apektado nga buluthuan ang nasanto sa panugyan sang Philippine Army.
Apisar nga wala sang ihibalo sa nagakatabo sa encounter site, ang DepEd Himamaylan ang naga-abiso sa mga manunudlo nga magwork from home na lamang kag magpatigayon sang modular ukon distance learning kun masarangan.
Ginapakamaayo man ni Sales nga flexible na sa karun ang education system sa nanarisari nga modalities nga na-umpisahan sang pandemic.
Pasalig naman sini nga kalabanan sa mga manunudlo nga nadesignar sa affected areas ang nakapanaog kasunod sang engkwentro apang aminado man ini nga may pila ka manunudlo nga mismo sa lugar nagapuyo.
Plano sang mga ini nga sa pagbalik sang klase sa lugar, igadugang man nila sa pagtudlo ang pamaagi sa pagrespondar sa kaangay nga mga armed conflicts.
Paathag ni Sales nga kaangay na lamang sa sitwasyon nga ginadumilian ang pagsulod sang mga indi suldado sa affected areas, ang mga estudyante kag mga manunudlo nga mabilin sa lugar ang makahibalo naman sang dapat himuon kag makasurvive.
