Ginkompirmar sang militar nga may isa ka narecover nga bangkay gikan sa makawala nga grupo sa nagluntad nga engkwentro kahapon sa Sitio Medel, Barangay Carabalan, Himamaylan City, Negros Occidental.
Suno kay Brigadier General Inocencio Pasaporte, Commander sang 303rd Infantry brigade, ang ika-lima nga engkwentro ang nagluntad kapin alas-5:30 sang hapon.
Pahayag sini nga pito tubtob 10 ka mga katapo sang New People’s Army (NPA) ang naka-engkwentro sang 94th Infantry Battalion sa Sitio Medel, Barangay Carabalan, malapit lamang sa ginluntaran sang una nga engkwentro.
Sa ginpatigayon nga scouring, narecover sang mga ini ang isa ka body count sang napatay nga NPA member, kasubong man ang isa ka .45 caliber pistol, backpack nga naga-unod sang personal nga pagkabutang, mga accessories kag pila ka mga bulong.
Wala naman sang nasamaran sa tropa sang gobyerno.
Ang bangkay ang ginpanaog sang mga militar kag yara na sa karun sa Solidad Funeral Homes sa syudad sang Himamaylan.
Suno kay Pasaporte, wala pa sila sang identity sa napatay nga katapo sang NPA kag ini ang ma-identify matapos nga makumpirmar sang duha tubtob tatlo ka persona nga mahimo pamilya ukon kaupod sini sa grupo.
Ginalantaw sang 303rd IB Commander nga ma-identify na ang bangkay subong nga adlaw.
Sa karun, nagapadayun ang clearing operation sa lugar.
Dugang pa ni Pasaporte nga wala pa ginapahanugutan ang pagbalik sang mga lugar nga apektado sang engkwentro bangod mahimo mabutang sa katalagman ang ila tagsa ka kabuhi.
Sa karun nagaserbe naman nga dako nga challenge sa tropa sang gobyerno ang pagtrack sa mga rebelde.
