Natumod na sang mga militar ang narecover nga bangkay nagikan sa makawala nga grupo sa nagluntad nga engkwentro kahapon sa Sitio Medel, Barangay Carabalan, Himamaylan City, Negros Occidental.
Sa interview sang Bombo Radyo Bacolod kay Brigadier General Inocencio Pasaporte, Commander sang 303rd Infantry Brigade, positibo naman nga ginkilala ang napatay nga miyembro sang terrorista nga New People’s Army (NPA).
Suno diri, ang napatay ang ginkilala kay Romeo V. Nanta alyas Juanito Magbanua/Juaning/Jack.
Suno kay Pasaporte, si Nanta ang sa karun commanding officer sang Regional Operational Command sang Komiteng Rehiyon – Negros kag spokesperson sang Apolinario Gatmaitan Command.
Suno kay Pasaporte, si Nanta ang nadakpan na sadtong 2011 kag nakagwa man sa ulihi bangud man sa effort sang front organizations sang mga ini kag nagbalik man liwat sa sabak sang NPA.
Ginpahayag man sini nga si Magbanua ang isa man sa imbulbado sa pag-ambush sa mga kapulisan sa banwa sang Binalbagan kasubong man sa pagpatay sa CAFGU sa banwa sang Moises Padilla.
Nahibaluan sa ginpatigayon nga scouring, narecover sang mga ini ang isa ka body count sang napatay nga NPA member, kasubong man ang isa ka .45 caliber pistol, backpack nga naga-unod sang personal nga pagkabutang, mga accessories kag pila ka mga bulong.
Wala naman sang nasamaran sa tropa sang gobyerno.
Ang bangkay ang ginpanaog sang mga militar kag yara na sa karun sa Solidad Funeral Homes sa syudad sang Himamaylan.
Wala man ginakalipay sang Philippine Army ang pagkadula sang ni Nata.
Suno diri, mangin madinalag-on lamang ang kampanya sang militar batok sa insurhensya bangud makabig lamang nga kadalag-an kun magabalik na ang mga rebelde sa sabak sang gobyerno bangud may yara man sang programa ang gobyerno nga makabulig sa ila agud makaumpisa sang panibag-o nga kabuhi.
Nagapanawagan man si Pasaporte sa makawala nga grupo nga magbalik na sa sabak sang gobyerno agud indi na magpareho kay Nanta ang matabo na ila.
