Tinutuyo sang Philippine Statistics Authority (PSA) nga ma-issuehan sang Philippine National ID ang 50 million ka mga pumuluyo sa pungsod Pilipinas.
Sa interview sang Bombo Radyo Bacolod kay Luis Gonzales, Chief Statistician, PSA-Negros Occidental, nakatutok ang PSA sa karun sa pagpanghatag sang national ID bangud may yara sang commitment ang opisina sang PSA nga mahatagan sang ID ang 50 million ka mga Pilipino subong nga tuig.
Ini ang ginalakipan sang 30 million nga physical ID kag 20 million 7-PHIL ID.
Suno kay Gonzales, agud nga makakuha sang E-PHIL ID ukon ang printable version sang national ID, magkadto lamang sa registration center sang PSA nga malapit sa lugar kun sa diin ini nagapuyo kag ipakita ang claim stab nga ginhatag sang tion nga nagparehistro sa national ID agud nga maverify sang in-charge kun available na ang printable version sang ID.
Ang printable version sang national ID ang pareho sa physical ID ang features kag wallet size ini kag mahimo man nga ipalaminate.
Sa tion nga makakuha sang printable version sang national ID kinahanglan sagihapon nga maghulat sa physical ID.
Nagpanugyan ang chief statistician sang PSA-Negros Occidental, nga ang wala sang ginahawidan nga claim stab nga may biometrics ang indi nalang magpadulong sa registration centers bangud wala na sila sang mahatag sa karun nga resolution sa nadula ukon wala sang claim.
Ginpahayag man sini nga ginahulat nalang nila ang instruction angot sa ginadihon sa karun sang national office sang PSA nga iprint ang tanan nga ID kag ihatag sa mga regional offices kag ipanagtag.
Pahanumdom man sini nga indi tanan nga may claim ang mahatagan sang ID bangud ang iban ang indi pa available ang printable version sang ID.
