Nagapanawagan ang pinuno sang 303rd Infantry Brigade sang Philippine Army sa publiko nga indi maghatag sang bulig sa nagapangayo nga oganisasyon nga nagapahayag nga ihatag sa mga evacuees nga apektado sang nagluntad nga engkwentro sang tropa sang gobyerno batok sa New Peoples Army (NPA) sa Barangay Carabalan kag katupad nga barangay sini sa Barangay Cabadiangan sa syudad sang Himamaylan.
Suno kay Brigadier General Inocencio Pasaporte, indi matuod ang ginapagwa nga data nga nagdangat sa 18 mil ang evacuees sa nasambit nga syudad.
Suno kay Pasaporte sobra-sobra ang data nga ginapagwa sang gina-aligar front organization sang makawala nga grupo kag ang mabaton nga bulig para sa mga evacuees ang wala nagakadto sa mga apektado kundi nagaderetso sa rebelde nga NPA.
Suno diri, nakita man nila nga bastante man ang bulig nga ginahatag sang gobyerno sa pagpanguna sang Department of Social Welfare and Development (DSWD) kag Local Government Units (LGUs) sang Himamaylan.
Suno diri, ginapamonitor man sini ang matuod nga numero sang evacuees kag liwat sini gina-athag nga sala ang data nga ginapagwa sang pila ka mga organisasyon.
Wala man sang namonitor nga nagkalamatay nga mga sapat bangud may yara man sang miyembro sang pamilya nga nag-evacuate nga nagbalik sa ila mga puluy-an agud nga atipanon ang mga kasapatan kag nagabalik man sa evacuation center.
Samtang ginpahayag man sini nga mahimo na makabalik ang mga pumuluyo sang Barangay Cabadiangan bangud ginsuro kag naclear na sang tropa sang gobyerno nga wala na sang presensya sang rebelde nga grupo sa lugar.
Suno kay Pasaporte ginatun-an pa sang 94th Infantry Batallion sang Philippine Army kun pagabutangan sang army detachment ang Barangay Carabalan sa syudad sang Himamaylan.
