Duha ka mga karbaw kag tatlo ka mga baboy ang nagkalamatay bangud sa igo sang bala samtang naga-engkwentro sang militar kag New People’s Army sa Barangay Carabalan, Himamaylan City.
Suno kay Provincial Veterinarian Dr. Placida Lemana, duha ka persona ang nagapanag-iya sang duha ka karbaw samtang isa lamang ang nagapanag-iya sang tatlo ka mga baboy nga nagkalamatay bangud sa engkwentro.
Suno diri, sa walo ka mga sitio sa Barangay Carabalan nga naapektuhan sa engkwentro, may yara sang 90 ka mga karbaw, 57 ka kanding, 23 ka mga baka, 130 ka mga baboy kag 1,600 ka mga manok nga bisaya.
Sang Oktubre 15, kalabanan sa mga evacuees ang amat-amat na nga nakabalik sa ila mga puluy-an kag didto nila nakit-an nga nagniwang ang ila mga kasapatan bangud kapin walo ka adlaw man ang mga ini nga wala nakakaon.
Suno kay Lemana, isa sa mga tikang sang veterinarian office sang Himamaylan amu ang magapanagtag sila sang vitamins, supplements kag technical advice agud mag-ayo ang mga sapat. Samtang, isa sa pinakadako nga naobserbahan ni Negros Occidental 5th District Representative Atty. Dino Yulo sa engkwentro sa tunga sang militar kag New People’s Army sa Barangay Carabalan amy ang economic displacement.
Sa interview sang Bombo Radyo kay Yulo, ginpahayag sini nga ang Barangay Carabalan ang isa sa pinakadako nga barangay sang probinsya kag ikatatlo ini sa may pinakamalapad nga land area sa Negros Occidental.
Nagapanguna naman ang Barangay Buenavista nga sakop man sang ciudad sang Himamaylan.
Suno diri, isa ini sa mga first responders sang nagsugod ang engkwentro bangud gilayon nga nagresponde ang iya mga volunteers pagakagab-i nga iya naman ginapasalamatan.
Isa sa pinakadako nga naobserbahan sini amu ang economic displacement bangud samtang indi pa makabalik ang pila ka mga pumuluyo sa ila areas, mas apektado ang ila mga palangabuhian.
Sang tinalikdan nga semana, amat-amat na nga nakabalik ang mga evacuees sa ila mga puluy-an magluwas lamang sa pila ka residente sang mga sitio nga wala pa naclear.
Nag-initiate naman ang kongresista sang mga tikang agud mabuligan ang mga pumuluyo ilabi na ang mga kabataan nga nagsuprer sang post traumatic psychological disorder bangud sa engkwentro.
Suno diri, iya ginpadal-an ang mga residente sang mga clowns, magicians kag nagpatigayon sang mga party games agud malingaw ang mga ini.
