Nakig-angot na ang Presidential Security Group kay MassKara Festival Director Atty. Pinky Mirano-Ocampo para sa seguridad sa pag-abot ni President Bongbong Marcos sa Paglaum Sports Complex sa Domingo nga amo ang ulihi nga adlaw sang MassKara Festival.
Una na nga ginkumpirmar sang mga organizers nga magaabot ang presidente, si First Lady Liza Araneta Marcos kag iya mga bata.
Kaina sang aga, nagpost sa iya social media account ni presidential son Ilocos Norte Rep. Sandro Marcos nga ari na ini sa Bacolod kag ginsugata ni Victorias City Mayor Javi Benitez.
Suno kay Ocampo, magapatigayon sang ocular inspection ang PSG sa Paglaum Sports Complex nga venue sang Arena Dance Competition sang 17 ka mga barangay sa ciudad.
Magaabot man sa Domingo si Vice President kag Education Secretary Sara Duterte kag magabisita ini sa Bacolod City National High School.
Nakabaton naman sang impormasyon ang Bombo Radyo Bacolod nga nag-abot na diri sa ciudad ang advance party ni Duterte.
