Nagapanawagan ang provincial veterinarian sang Negros Occidental sang kooperasyon sang mga nagatabok nagikan sa iban nga probinsya nga likawan nga magdala sang pork, pork products kag buhi nga baboy agud nga matipigan ang P6 billion swine industry sang probinsya.
Kahapon bangud sa ginapatigayon nga lapnagon nga information dissemination angot sa African Swine Fever, naintercept ang kapin lima ka kilo nga karne sang baboy sa banwa sang EB Magalona, Negros Occidental nga gindala sang nagbiyahe nagikan sa Tapaz, probinsya sang Capiz sa bulig sang isa ka Punong Barangay sa nasambit nga banwa.
Sa interview sang Bombo Radyo Bacolod kay Dr. Placida Lemana, nagapanawagan ini nga mangin honest ang mga nagapadulong sa probinsya sa pagdeklarar sang mga dala sini bangud may yara sang mga may dala nga pork products nga ginasulod sa backpack gani indi na matsekyar sang PVO personnel.
Santo sa resulta sang imbestigasyon sang provincial veterinary office, nakalusot ang nasambit nga traveller sa Bredco port sa syudad sang Bacolod bangud ginbutang ini sa eco bag kag gilayon man ini nagsakay sa nagsugat diri nga pribado nga salakyan.
Madasig man nga nareport kag naintercept ang gindala nga karne sang baboy bangud ang EB Magalona ang ginpabantayan na ilabi na nga isa ini sa ginalantaw nga mahimo masudlan sang mga ginapalusot nga kontrabando.
