Indi magnubo sa 30 ka mga balay sa ciudad sang Silay ang totally-damaged bangud sa Bagyo Paeng.
Sa interview sang Bombo Radyo kay Silay City Mayor Joedith Gallego, ang mga balay nga naguba ang nahamtang sa Zone 3, Zone 4, Zone 5 kag Dacutan Dako sa Barangay Mambulac nga aga pa man niya ginbisitahan kaina.
Padayon naman sa karon ang assessment sa partially-damaged houses sa nagkalain-lain nga barangay.
Santo sa data, 101 families ang nag-evacuate sa pila ka mga barangay sa ciudad sang Silay, ilabi na sa coastal barangay kaangay sang Barangay Mambulac.
Gilayon naman nga naghatag sang family food packs ang Silay City government sa mga residente nga apektado.
Suno kay Gallego, magapabilin anay ang mga residente nga totally-damaged ang balay sa gym sang ciudad bangud wala sila sang pulian.
Pila naman ka mga mangingisda ang nagub-an sang sakayan gani istoryahan sang Silay City Disaster Risk Reduction and Management Council kun ano ang mabulig sa ila.
Wala naman sang mga pumuluyo nga napilasan kadungan sang pagmadlos sang hangin kag pagkaguba sang ila balay.
Subong nga hapon, nagsubside na ang tubig sa Silay apang wala lang anay ginpapauli ang mga evacuees.
Nag-apelar naman ang local chief executive nga magkooperar kag magbuligay agud nga makaambit ang mga nagakinahanglan kasunod sang pagkaguba sang ila balay.
Sa ginalauman nga pagbubo sang madamol nga ulan subong nga hapon tubtub maggab-i, naghingyo ang alkalde sa mga pumuluyo nga unahon gid ang seguridad.
