Gintupok sang kalayo ang isa ka balay sa Purok Riles, Barangay Salvacion, banwa sang Murcia, alas 7:30 kagab-i.
Ang balay ang ginapanag-iyahan ni Nemia Banay.
Sang natabo ang insidente, si Banay kag ang isa sini ka bata ang yara sa pihak nga balay samtang nabilin naman ang bata sini nga special child.
Nahibaluan nga 35 na ka tuig nga wala sang kuryente sa nasambit nga purok kag solar lamang ang ila ginagamit bilang suga apang bangud nga nag-ulan sang Lunes kag kahapon, wala ini nagamit.
Nagasiga naman ang kandila sa ila altar, nga ginalantaw nga amu ang gintunaan sang kalayo.
Gintupok sang kalayo ang balay kag mga haligi na lamang nga semento ang nabilin bangud himo sa light materials ang ibabaw nga portion sang balay.
Natapna ang sunog bangud sa pagbuligay sang mga residente kag augmentation man sang Bureau of Fire Protection.
Wala sang may nasamaran sa sunog apang ginapangita pa sa karun ang wallet nga nagaunod P20,000 nga gin-utang lamang ni Banay sa isa ka lending corporation.
Nasunog man ang motorsiklo nga bag-o gid lamang bakal sang isa sini ka bata.
Sa interview sang Bombo Radyo Bacolod kay Fire Officer 1 Den Ric Bontigao, arson investigator sang Murcia Fire Station, magabalik pa sila sa ginluntaran sang sunog subong nga adlaw para sa dugang pa nga imbestigasyon natuhoy sa gintunaan sang insidente.
Sa karun, kandila pa lamang ang ginalantaw nila nga nagtuga sang sunog.
Suno diri, unpenetrable ukon indi masulod sang mga firetruck ang area kun sa diin nagluntad ang sunog gani sila ang nagpatigayon nalang sang bucket brigade.
Natigayon nga mafire-out ang sunog alas-8:03 sang gab-i.
