Nagpagwa man sang statement si Bacolod City Mayor Alfredo Benitez kasunod sang kontrobersyal nga pahayag ni Iloilo City Mayor Jerry Treñas sang tinalikdan nga adlaw nga mahangin sa Bacolod gani pierde ang ciudad sang Iloilo sa sugiday.
Santo sa nauna nga statement ni Treñas, iya ginpahayag nga ginbasa niya ang speech ni Benitez sa MassKara kun sa diin makaduha ka beses niya ka beses ginmention ang Iloilo kag ginpahayag nga nalapawan sang Bacolod ang Iloilo.
Suno kay Treñas, padayon ang Iloilo sa pagpanguna sa Region 6 kag magapadayon nga champion sa tanan nga mga events sa Western Visayas nga indi magpaulihi sa iban.
Suno kay Treñas, pierde ang Iloilo sa Bacolod sa renewable energy bangud sa wind energy bangud mahangin sa Bacolod kag pierde ang Iloilo sa sugiday pirme.
Apang nagpanindugan naman ang alkalde nga pinakamalimpyo ang Iloilo kag malayo ini sa Bacolod kasunod man sa mga tourism events.
Sa statement nga ginpagwa ni Benitez kaina sang aga, ginpahayag sang alkalde nga naga-admire ini sa Iloilo City kag sa pagkamatuod, idol niya si Treñas.
Suno kay Benitez, madugay na sila nga mag-abyanay ni Treñas kag ginatangla niya ini bilang mentor sa leadership kag initiative.
Kun may nalapawan man ang Bacolod sa Iloilo suno kay Benitez, ini amo ang pag-angkon sang huben kag gwapo nga mayor.
Suno sa local chief executive, proud ini sa recovery sang Bacolod kun sa diin madinalag-on ang pagpatigayon sang MassKara Festival nga nagpasanyog sang local consumption.
Suno kay Benitez, ang hangin sa Bacolod ang makusog nga nagadapya padulong sa mainuswasyon nga ekonomiya.
Isa ka oras matapos naggwa ang statement ni Benitez, nagpahayag man ni Treñas nga importante sa Region 6 ang development sa Bacolod.
Suno diri, suportahan sang Iloilo ang tanan nga developmental efforts.
Suno sa alkalde, kinahanglan ang padayon nga pagreinvent kag pagdevelopment agud indi mangin irrelevant.
