Ginatumod pa sa karun sang mga kapulisan sang Bacolod Police Station 4 ang motibo sa pagpatay sa barbero sa Purok Fortune B, Barangay Estefania, Bacolod City sang Biyernes sang gab-i.
Ginkilala ang biktima kay Bryan Diaz, 41 anyos kag residente sang Barangay Mambulac, Bacolod City.
Sa interview sang Bombo Radyo Bacolod kay Police Major Ritchee Gohee, station commander sang Bacolod Police Station 4, ginkadtuan sang imbestigador sa kaso ang balay sang live-in partner ni Diaz apang wala sang tawo bangud yara ini sa Manila kag nagapaidalom sa chemotheraphy agud kuntani maathagan sa pila ka bagay.
Ginpadulungan man sang mga ini ang balay nanday Diaz sa syudad sang Silay apang wala man sang tawo.
Nagkadto man ang mga ini sa balay sang bana sang live-in partner ni Diaz apang wala man ini didto bangud yara na ini sa United Arab Emirates ukon UAE.
May nakuha man nga cctv footage apang nakaside view ang suspek samtang nakasakay sa scooter.
Ang biktima ang may yara sang kaso nga rape kag 2 counts sang sexual assault.
Napriso man ini sang nakaligad nga tuig matapos maaresto sa kaso nga rape apang nakagwa bangud nagpaareglo ang biktima.
Wala naman ginpa-autopsy sang pamilya ang biktima.
Wala man sa drug watchlist sang station 4 ang biktima.
Apang ginkumpirmar naman sang tinalikdan sang hepe sang Silay City Police Station nga pakaisa sini si Jezreel Diaz, ang subject person sa buybust operation nga nagviral matapos naghublas.
Sa karun padayon pa ang imbestigasyon sang Police Station 4 agud nga mahibaluan ang motibo kag kun sin o ang nagpatay sa biktima.
