Ginpahayag sang station commander sang Bacolod Police Station 8 nga ginahulat nalang ang pamilya sang biktima nga si PFC Edmark Iwayan agud nga makuha ang bangkay sini.
Suno kay Police Major Joery Puerto, antes pa natabo ang insidente nagpadulong si Iwayan sa syudad sang Bacolod kaupod ang buddy sini nga si PFC Joebert Villagracia agud magkuha sang bonus.
Matapos nga makakuha sang bonus nagpadulong ang mga ini sa resto bar sang amigo sini nga si Joebert Visem nga anay katapo man sang army.
Samtang, nagainum-inum ang mga ini, nagsulod man ang grupo sang suspek nga si Ulyssis Carampatana nga isa ka bank accountant agud mag-inum.
Nagpangayo ang mga ini sang last order apang wala nagpasugot ang tag-iya kun sa diin nagluntad naman ang pagbaisay kag naggabot sang armas-luthang si Carampatana rason nga nagluntad ang pagbayluhanay sang luthang gikan sa grupo ni Carampatana kag Iwayan.
Naigo si Iwayan sa ulo kag iban nga bahin sang lawas nga nagresulta sa iya nga kamatayon.
Nakabalos si Iwayan antes ini ginbawian sang kabuhi apang sa abaga lang naigo si Carampatana.
Narekober sa crime scene, onse ka fire cartridge sang 9mm ; lima ka cartridge sang 45 calibre; lima ka deformed slug kag isa ka 45 pistol nga may serial no. 019596AFP.
Wala naman narecover ang armas sang suspek kag ginalantaw nga mahimo nadala na sang mga grupo sini nga kaupod sa pag-inum sa bar.
Ang mga nasamaran ang gindala sa ospital samtang ang suspek ang ginpaidalom sa ospital arrest.
Sa tion nga macontact na ang pamilya sang biktima pasakaan sang kaso ang suspek paagi sa inquest proceedings.
Si Carampatana ang pasakaan sang kaso bangud ini ang una nga naggabot sang armas-luthang.
Si Iwayan ang kabahin sang 94th Infantry Battalion kag naassign sa Kabankalan City kag nangin kabahin man ini sang augmentation force sang Philippine Army sa nagluntad nga encounter sa Himamaylan City sang nakaligad nga binulan.
