Nagpahanumdom ang commander sang 303rd Infantry Brigade sa tanan nga mga suldado nga iya nasakupan nga indi mag-inom sa pampubliko nga lugar ilabi na sa bar agud malikawan ang indi maayo nga hitabo kaangay sang shootout sa To-Lips Restobar sa Lacson Extension, Brgy. Singcang-Airport, syudad sang Bacolod kahapon sang kaagahon.
Sa interview sang Bombo Radyo kay Brigadier General Inocencio Pasaporte, ang pagkapatay ni Private First Class Edmark Iwayan ang isa ka unfortunate nga hitabo.
Si Iwayan ang nagkuha sang iya nga bonus sa Bacolod bangud assigned ini sa 94th Infantry Battalion sa Ayungon, Negros Oriental apang ini ang nagtabo sa iya nga anay classmate sa isa ka bar, kun sa diin ang suspek nga si Ulyssis Carampatana ang nagpadulong kag nag-ayo nga mag-inom.
Matapos nga wala ini ginsugtan nga magdugang pa sang isa ka ilimnon, gilayon nga nagpagwa si Carampatana sang armas kag nagluntad ang shootout, nag-agom sang pila ka mga igo si Iwayan rason sang pagkapatay sini apang si Carampatana ang nakahospital arrest sa karun.
Suno kay Pasaporte, likawan ang pag-inom kag magsunod gid sa guidelines nga nagapahayag nga maglikaw sa amo nga lugar kag mas maayo kun pribado para mapalayo ang posibilidad nga magluntad ang amo nga insidente.
