Aminado si Negros Occidental Provincial Agriculturist Atty. Japhet Masculino nga ang pagreclassify sang duta bilang agricultural to non-agricultural ang nagakinahanglan sang malawig nga proseso apang ini ang ginapahanugutan sang gobyerno nga dapat man iregulate.
Nahibaluan nga nagdebate sanday Senators Raffy Tulfo kag Cynthia Villar angot sa conversion sang agricultural land kag ginahimo nga subdivision.
Sa interview sang Bombo Radyo kay Masculino, ang conversion sang duta ang indi trabaho sang Department of Agriculture kundi iya sang Department of Agrariam Reform.
Ang mga duta naman nga sarang maconvert ang nakadepende sa ordinansa sang ciudad ukon banwa.
Ini ang kaangay na lamang ang ciudad sang Bacolod nga nag-approve sang land conversion nagikan sa agricultural padulong sa non-agricultural antes pa man ang pagpatuman sang national government sang Comprehensive Agrarian Reform Program.
Aminado man si Masculino nga dako nga problema para sa mangunguma kun wala na sila sang duta bangud nabaligya na ini kag naconvert na ini bilang residential land.
Suno sa iya, kulang ang suporta sang gobyerno gani labi na gid nga nagpigado ang mga mangunguma bangud sa mahal nga presyo sang abono kag barato nga presyo sang ginabaligya nga produkto.
Ginapatihan nga bangod sa Rice Tarrification Law, maganubo ang presyo sang bugas apang makit-an sa karun sa merkado nga wala sang pagnubo sa presyo kundi nagsaka pa gid.
Suno kay Masculino, kinahanglan nga lantawon sang Kongreso ang lakat sang produksyon sang bugas bangud dako ang epekto sini sa food security kag sa mga mangunguma.
