Hulaton nalang sang grupo sang transportasyon ang resulta sang meeting ni Bacolod City Mayor Alfredo Benitez kag sang Land Transportation Franchising and Regulatory Board angot sa ginahingyo sang mga ini para sa modernisasyon.
Sa interview sang Bombo Radyo Bacolod kay Albert Villanueva, chairman sang Samahan ng mga Tsuper at Operators Negros (SSTONE), nagalaom ini nga mangin positibo ang resulta sang meeting sang alkalde kag sang LTFRB agud nga indi man mapabay-an ang mga magagmay nga jeepney operators.
Nagapanindugan man ang grupo nga indi mag-upod ang mga ini sa kooperatiba para sa jeepney modernization.
Suno kay Villanueva, indi sila luyag nga ihatag ang ila individual franchise sa kooperatiba kag magalain na ang ngalan sa ulihi kag indi man mapat-od ang sistema sang pagpadalagan sang mga units.
Ginpahayag man sini nga nagahingyo ang grupo sa gobyerno nga hatagan pa sang duha ka tuig nga extension agod maka-pasad sang modenized jeep.
Nagahingyo man ang SSTONE nga indi pagpatam-an kataas ang standard sang modernized jeeps bangud nga sarang sila nga makahimo sang units nga magasanto sa gihapon sa Clean Air Act.
Nahibaluan nga bwas, Noviembre 22, matapos na ang duha ka semana nga moratorium sa dakpanay nga ginhatag sang Land Transportation Office (LTO) Region 6 mga traditional jeeps sa Bacolod nga wala sang prangkisa.
