Wala nagahinulsol si Randy Maniego sa iya ginhimo nga pagpugot sang ulo ni Gelly Recodo sa Barangay Maquiling, ciudad sang Sagay kaina sang aga.
Sa interview kay Maniego nga tumandok sang Barangay Dian-ay, Escalante City, nagpangayo siya kay Recodo sang P10,000 bilang partida sa pagsagod niya sang karbaw apang namahalan ang biktima tubtub nga ginpanubo sang suspetsado sa P5,000.
Nag-ayo pa gid si Recodo tubtub P3,000 nga ginhatag na niya sa suspetsado para sa duha ka karbaw nga iya ginsagod.
Bangud P3,000 lang ang iya nakuha sa pagsagod sang karbaw, gin-ako ni Maniego nga mabalos siya kay Recodo sa husto nga tinion gani nagplano ini nga patyon niya ang tag-iya sang karbaw agud nga mangin patas na ang tanan.
Direkta nga nagsabat si Maniego nga wala ini nagahinulsol sa iya nga pagpatay kay Recodo.
Nagalaom ang suspetsado nga kuntani indi lang maglain ang buot sang iya nga pamilya bangud sa iya nga ginhimo bangud luyag lamang niya nga makapatas sa pagsagod sang karbaw.
Suno kay Maniego, malain ang batasan ni Recodo bangud wala siya ginhatagan sang partida gani siya ang nagdumot.
Suno diri, nagluhod siya sa baga kagab-i agud magpangayo sang patawad sa Kahitaasan sa himuon niya nga sala.
