Ginatumod pa sang mga otoridad ang identity sang duha ka gina-aligar nga New People’s Army (NPA) sa nagluntad nga engkwentro sa tunga sang 62nd Infantry Battalion sang Philippine Army kag New People’s Army sa Barangay Quintin Remo, Moises Padilla, Negros Occidental.
Sa interview sang Bombo Radyo Bacolod kay Lt. Col. William Pesase, commander sang 62nd IB sang Philippine Army, ginkumpirmar sini nga may nagluntad nga engkwentro sa tunga sang tropa sang gobyerno kag gina-aligar nga miyembro sang Central Negros 1.
Nagluntad ang engkwentro kasunod sang ginapatigayon sang clearing operations sang mga militar bangud man sa engkwentro nga nagluntad sang tinalikdan nga semana sa syudad sang Guihulngan, Negros Oriental.
Suno kay Pesase, nagdugay sang kapin 30 minutos tubtob 40 minutos ang pagbayluhanay sang lupok.
May narecover naman ang tropa sang gobyerno nga armas-luthang nga ginalakipan sang M-16.
Ginpahayag man sini nga bisan sa battalion headquarters sa banwa sang Isabela ang bation pa ang pagbayluhanay sang lupok.
Suno diri, nagapadayon pa sa karun ang pursuit operation sang tropa sang gobyerno.
Wala naman sang nasamaran sa bahin sang tropa sang gobyerno.
