Ginkumpirmar sang regional director sang Commission on Human Rights nga naghingyo sang ila bulig ang bata sang ginaalegar miyembro sang New People’s Army nga napatay kadungan sang engkwentro batok sa mga suldado sa ciudad sang Kabankalan sang Miyerkules sang aga.
Ini ang kasunod sang alegasyon sang National Democratic Front nga si Ericson Acosta ang ginpick up sang mga suldado kag gin-execute gani indi engkwentro ang natabo batok sa 94th Infantry Battalion kag 47th IB.
Suno kay Atty. Jonnie Dabuco, nakabaton ini sang sulat sang bata ni Acosta nga ginforward sang CHR Central Office sang Disyembre 1.
Ang bata ang nagahingyo nga ilocate kag iretrieve ang bangkay sang iya amay.
Suno kay Dabuco, nakig-angot na ini sa Philippine National Police kag Philippine Army agud mahibaluan kun sa diin ang gindala ang bangkay ni Acosta.
Suno sa CHR regional director, nagpangayo man lang sang bulig ang bata ni Acosta angot sa bangkay sang iya amay gani magapatigayon nalang ang mga ini sang imbestigasyon.
Ginpaathag ni Dabuco nga bisan wala sang reklamo ang pamilya, nagapatigayon gihapon ang CHR sang motu proprio investigation agud mahibaluan kun ano ang matuod nga natabo, ilabi na sa karon nga may issue nga nagtuhaw sa tunga sang mga rebelde kag sang mga suldado.
Suno sa CHR official, wala sila nagahambal kun sin-o ang may sala sa karon bangud wala pa man sila nakatapos sang imbestigasyon.
Suno kay Dabuco, magahatag sila sang patas nga kahigayunan sa magtimbang nga kampo agud makahatag sang ebidensya sa ila nga tagsa ka claim kag mahibaluan kun ano gid ang kamatuoran.
Ginsuguran na suno sa iya ang imbestigasyon apang indi nila matumod kun san-o ini matapos bangud magadepende ini sa availability sang kuhaan sang ebidensya.
