Nagpanindugan ang punong barangay sang Barangay Tangub, Bacolod City nga wala sini ginbakbak ang pader sang complainant nga nagpasaka sang kaso batok sa iya sa Ombudsman.
Nahibaluan nga nag-ugat ang reklamo sadtong 2019 sang ginbakbak ang portion sang kudal nga nasakupan sang private property apisar nga gin-abisuhan na sini ang team sang barangay nga nagapatigayon sang clearing operation sang road obstruction nga indi pagtandugon bangud yara pa ini nakasulod sa propedad sini sa Barangay Tangub, Bacolod City.
Sa interview sang Bombo Radyo Bacolod kay Punong Barangay Noli Villarosa, gin-athag sini nga wala sang kaangtanan sa corruption ang kaso sini.
Suno kay Villarosa, nagtuman lamang ini sa executive order ni anay Presidente Rodrigo Duterte nga limpyuhan ang mga road closures.
Ginpahayag sini nga ginpahibalo lamang sini ang anay manunudlo nga si June Medalla nga ang portion sa ginatungtungan sang iya kudal ang kabahin pa sang road lot.
Suno kay Villarosa wala niya gintandog ang kudal kundi ginpahibalo lamang sini ang tag-iya nga mahimo nga ipakakas ang kudal kag ipaidog bangud kabahin pa ini sang road lot.
Suno diri ang simple misconduct nga kaso sini sa Ombudsman ang una na nga nadismiss apang liwat nga ginpamatbatan matapos nga gingrant sang Ombudsman ang ginfile nga motion for reconsideration sang complainant.
Ginpahayag man sini nga may kinamatarong man siya nga magfile sang motion for reconsideration sa Ombudsman kag dako ang pagpati sini nga ikonsiderar man ini sang nasambit nga ahensya bangud may ginauyatan man ini nga mga dokyumento nga makapamatuod nga ang ginatungtungan sang kudal ni Medalla ang kabahin sang road lot sang syudad.
Nagapanawagan man ini sa Ombudsman nga magpatigayon man sang imbestigasyon agud nga nga mahibaluan ang kamatuoran.
