Nagdangat sa 68 ka mga designated fireworks display areas ang ginaprubahan sang Bacolod City Police Office kag Bacolod Fire Station sa syudad sang Bacolod.
Sa interview sang Bombo Radyo Bacolod kay Police Lt. Col. Noel Polines, chief of operations unit sang Bacolod City Police Office, ang sa likod lamang sang Pope John Paul Tower nga nasakupan sang Barangay 12, syudad ang Bacolod ang gindesignate nga firecracker zone sa syudad apang may yara sang 68 ka mga lugar sa syudad ang gin-aprubahan agud mabutangan sang fireworks display.
Suno kay Polines, ginsiguro sang mga ini nga nakapasar sa requirements sang BCPO kag BFP ang ginhatagan sang permit nga makabutang sang designated fireworks display areas agud nga malikawan sa ulihi ang pagbinasulay kun may insidente nga matabo.
Ginsiguro man nga open areas ukon malayo sa mga balay ang designated fireworks display zone ukon makapalupok sang mga palupok ang mga pumuluyo agud nga malikawan ang fireworks related incidents.
May yara sang nakastandby nga firetruck, BFP personnel, personnel sang Bacolod Police Station 1 kag nagdeploy man sang force multipliers agud magsiguro ang safety sa firecracker zone sa syudad sang Bacolod.
Nagcoordinate man ang mga kapulisan sa Barangay Officials sang Barangay 12 agud nga magbulig bantay sa firecracker zone.
Ginadiscourage man ang pagdala sang mga senior citizen kag mga menor de edad agud nga malikawan nga madalahig kun may insidente nga matabo.
Nagakadapat man nga may yara sang nakahanda nga tubig, balas kag fire extinguishers kada stalls.
Hugot man nga ginadumilian ang pagbaligya sang palupok sa mga tiyangge.
Nagapanawagan man si Polines sang kooperasyon sang tanan agud nga masiguro nga hilway ang tanan sa fireworks related incidents.
