Nagpresentar na ang Hiraya Water Corporation sang ila plano sa water ditribution sa ciudad sang Bacolod.
Nahibaluan nga ang Hiraya amo ang nagbakal sa PrimeWater nga yara sa joint venture agreement sa Bacolod City Water District (BACIWA).
Sa interview sang Bombo Radyo kay Bacolod City Councilor Bobby Rojas, Chairperson sang Committee on Energy and Public Utilities, sa ginpatigayon nga committee hearing sang tinalikdan nga semana, kun sa diin ginpresentar sang hiraya ang ila mga plano sa Bacolod.
Suno sa Konsehal, gintunga sang hiraya sa lima ka strip ang ciudad agud matumod ang mga brgy nga kinahanglan pagakay-uhon.
Suno diri, kun sin-o ang incharge sa brgy amo ang magakay-o sa mga leakages kag mga guba nga tobo.
Dugang pa, lakip man sa programa sang hiraya ang pag-ilis sang 5,000 ka mga water meters.
Magadugang man ini sang 30 ka data loggers.
Suno kay Rojas, sa data loggers mahibaluan kun ano ang pressure sang tubig sa tubo.
Pahayag sini nga sa subong yara sa 95 mld ang supply sng tubig sa ciudad kag target sini nga malab-ot sa masobra 100mld.
Sa bahin naman sang share sang BACIWA, ginpahayag ni Rojas nga nakaremit ang Prime Water sang P600 million sa lima ka tuig sini nga serbisyo sa ciudad.
Suno diri, nagpasalig ang Hiraya nga magahatag sang maayu nga serbisyo sa ciudad.
Ginpahayag naman sang Konsehal nga hingyo lang gid niya sa Hiraya nga hatagan sang 24/7 nga matinlo nga tubig ang mga pumuluyo.
