Dako ang kalipay sang tumandok sa banwa sang La Castellana matapos nga mag Rank 6 sang Licensure Examination for Teachers (LET).
Sa interview sang Bombo Radyo Bacolod kay Je Ann Tordesillas Florendo, tubtob sa karun nagapabilin pa ini sa Manila agud magbantay sa tindahan sang iya nga magulang nga natalana pa nga magpa-opera.
Ang amay sini ang isa ka mangunguma samtang house wife naman ang iya nga iloy.
Siya ang nakagradwar sa Cabacungan National High School sa La Castellana sadtong 2007, apang bangod sa kapigaduhon wala ini gilayon naka-eskwela sa kolehiyo.
Ini ang madamo man sang ginsuglan nga trabaho, tubtob nga natigayon nga mapa-eskwela sang iya mga ginikanan sang 2016 sa kurso nga Bachelor of Science in Elementary Education sa La Carlota City College.
Ginakonsiderar naman sini nga tyansa ang indi gilayon pag-eskwela bangod siya ang nakarank 6 sa pasinawan.
Suno diri, ginapangamuyo man sini nga makasulod sa ranking kag siya ang nagreview man sang todo para diri.
Dako ang pagpasalamat sini nga ginsabat sang Diyos ang iya nga pangamuyo.
Pahayag sini nga gintinguhaan gid niya nga makasulod sa top agud nga makahatag sang dungog sa iya nga ginikanan.
Suno pa diri nagpadulong ini sa Quaipo sa balay sang iya magulang para sa pagreview antes magkuha sang LET.
Pahayag sini nga samtang siya ang nagatrabaho sa tindahan sang iya magulang, may dala man ini nga libro agud nga makareview kun wala sang customer ukon sa masami siya ang nagalantaw sang videos.
Suno diri, ginakuha man siya sang review center sadto agud nga itrain kuntani agud mangin lecturer apang ini ang nagbalibad bangod siya ang may trabaho.
Pahayag sini nga dako man ang kalipay sang iya mga ginikanan sang ginpabalo sang iya magulang nga siya ang rank 6.
Pahanumdom sini sa mga naga-eskwela nga tipigan ang tyansa nga mapa-eskwela sang ginikanan bangod sa masami kun maka-untat sa pag-eskwela mabudlay na ang pagbalik sa pagtuon ilabi na nga naka-experience na sa pagbaton sang sweldo.
Nagapati ini nga mas dako nga bentaha kun natapos na ang pag-eskwela sa kolehiyo antes magsulod sa pagtrabaho.
Ginakabig naman sini nga dako nga oportunidad sa mga estudyante ang libre nga kolehiyo bangod ang pag-eskwela ang madala tubtob nga nagakabuhi, gani dapat likawan ang barkada.
Pahanumdom man sini nga ang ginikanan ang wala nagapa-eskwela sa ila kabataan sa pagpinsar nga ini ang magabulig balik sa ila, kundi luyag lamang sang mga ini nga makaangkon sang maayo nga bwas damlag ang ila mga kabataan.
