UNITED KINGDOM – Apisar nga Paskwa, tuman ka lala sa karun ang nagaluntad nga mga strike sang mga empelyado sa pribado man ukon panggobyerno nga sektor sa United Kingdom nga nagapanawagan sa pagpasaka sang sweldo karun nga padayun nga pagsaka sang cost of living bangod sa inflation.
Suno kay Bombo International Correspondent Ramil Isogon, derekta sa London, United Kingdom, isa sa mga nagpatigayon sang strike amo ang mga nurses sa pungsod.
Pahayag sini nga bisan ang mga railway employees ang natalana naman nga magstrike sa Desyembre 27 kasubong man sa masunod nga tuig sa Enero 3, 4, 6 kag 7.
Subong nga adlaw, nagpatigayon man sang transport strike ang mga bus drivers kag liwat nga magastrike sa Desyembre 27, 31 kag Enero 10.
Panawagan sang mga ini ang pay increase kasubong man ang iban pa nga benepisyo kaangay sang pension.
May isa ka adlaw sa kada isa ka semana man nga strike ang mga manunudlo sa United Kingdom nga ginalakipan sang 150 ka mga unibersidad.
Suno kay Isogon, bangod sa nagasaka nga balor sang basic commodities kinahanglan man nga magsaka ang sweldo agud nga ini ang makasustiner sa pang-adlaw adlaw.
Bisan ang mga border forces sa airports ang nagstrike naman sang Desyembre 23 kag tuyo nga liwat magpatigayon sang pagstrike sa New Years Day.
Ang mga nurses nga nauna na nga nagstrike sang Desyembre 20 ang ginalauman nga liwat magapatigayon sang protesta sa Enero 18 kag 19, 2023.
Dugang pa ni Isogon nga plano man sang mga fire fighters nga makigbahin sa strike.
Paathag sini nga indi mahapos ang paglunsyar sang strike sa pungsod bangod ini ang nagakinahanglan pa sang pagboto kag makaangkon sang 50 percent approval.
Suno kay Isogon, bisan nga Paskwa nagapadayun sa pagdako ang isyu ilabi na kun indi magsaka ang sweldo sa pihak sang segi-segi nga pagsaka sang presyo sang balaklon kasubong man sang utility bills.
