Ginkumpirmar sang chief of operations sang Philippine Coast Guard-Western Visayas nga may yara sang ginpagwa nga gale warning ang Philippine Atmospheric, Geophysical and Astronomical Services Administration (PAG-ASA) kun sa diin ang mga magagmay nga sakayang pandagat ang wala ginapahanugutan maglayag sa dagat bangud sa dalagko nga balod.
Sa interview sang Bombo Radyo Bacolod kay Commander Jansen Benjamin, sa tion nga may gale warning ginaabisuhan ang mga magagmay nga sakayan ukon yara sa 250 tonnage panubo kaangay sang fishing vessel nga indi maglayag sa dagat ilabi na sa oras nga ala 1:00 tubtob alas 4:00 ang takna sang hapon bangud mabaskog ang amihan samtang ang mga dalagko naman nga sakayan kaangay sang Roro vessel kag fastcrafts nga masobra sa 250 gross tonnage mahimo ang mga makalayag halin Bacolod padulong sa Dumanggas vice versa kag ang Iloilo Guimaras ang special area gani nagapadayon ang pagbiyahe sang mga sakayang dagat.
Apang ginpahayag man sang chief of operations sang PCG-Western Visayas nga kun kaisa ang biyahe sang sakayan padulong sa Guimaras halin sa Iloilo vice versa ang ginapauntat bangud nakita man sang coast guards nga dalagko ang bangud kag indi hilway sa pagbiyahe.
Samtang may yara man sang prerogative ang mga kapitan sang fastcrafts nga indi maglayag sa tion nga makita nga indi safe nga magbiyahe bangud experienced mariner ang mga ini kag nakahibalo nga magbasa sa dalagan sang dagat kag ginauna man sang mga ini ang safety sang mga travellers.
Ang mga personnel sang coastguards nga naassign sa tagsa ka puerto kag substations ang nagagwa man agud nga magpahibalo sa mga mangingisda kag mga pumuluyo angot sa gale warning nga ginpagwa sang PAG-ASA kag maabisuhan nga indi magpalawod bangud sa malain nga panahon.
Nagpanugyan man si Benjamin nga patihon ang mga abiso sang mga ahensya sang gobyerno kaangay sang coastguard kag PAGASA bangud sa karun nagagamit na sang teknolohiya kun sa diin accurate ang pagbasa sini sa dalagan sang panahon kag sitwasyon sang dagat.
Nagapangayo na ini sang pasaylo in behalf sang Philippine Coast Guards, Philippine Ports Authority kag shipping lines kun magdecide nga ini maglayag halin sa port of origin bangud ang safety ang kinahanglan iprayoridad kag wala sang amount of sorry kun may yara matabo nga insidente.////
