Aminado ang election officer sang ciudad sang Bacolod nga mas diutay ang turnout sang mga nagaparehistro nga luyag magboto sa Barangay and Sangguniang Kabataan elections humalin sang nagresume ang opisina matapos ang pagsulod sang bag-ong tuig.
Sa interview sang Bombo Radyo kay Bacolod City Election Officer Atty. Katrina Trinio Caña, mas nagdamo ang nagparehistro subong nga Huwebes kun ipaanggid sang tinalikdan nga tatlo ka adlaw kun sa diin maulanon ang tiempo apang wala pa natumod kun pila ang kabug-usan nga nagprehistro halin kaina sang aga.
Sa Gaisano City Mall naman sa karon ang voter registration sang Comelec Bacolod.
Santo sa data sang Comelec Bacolod, masobra 6,000 na ang nagparehistro halin sang nagresume ang voter registration sang Disyembre 12.
Ang voter registration ang tubtub lamang sa Enero 31 gani nagpanawagan si Caña sa nga kinahanglan magparehistro ukon magpatransfer sang voter registration nga indi na paghulaton ang deadline agud nga malikawan ang pagdinaguso sa registration center.
