Nagahatag sang kabudlayan sa mga tenants sa Libertad Market sa syudad sang Bacolod ang mga basura nga wala makolekta sang garbage hauler sa syudad sa sulod sang pila ka semana.
Sa interview sang Bombo Radyo Bacolod kay Charlene Borromeo, isa sa mga tenants, nabudlayan ang mga ini bangud sa baho sang ginatuga sang basura.
Suno kay Borromeo, sang tinalikdan nga semana, nakaon na sang gintambak nga basura ang dalan kun sa diin nangin obstruction na ini sa mga nagaagi nga mga pribado kag de pasahe nga salakyan bangud indi na maagyan.
Ginpahayag man sini nga halos wala na sila nakakaon sang nagliligad nga adlaw bangud nag-ulan kag nag-usbong na ang baho sang mga basura.
Suno sa tenant, dapat nga madamo sang truck sang IPM ang magakolekta sang basura bangud kun isa lang indi maubos kuha ang nagatambak nga basura.
Ginpahayag man sini nga sa notisyaran niya isa lang sa isa ka adlaw nagakolekta ang garbage hauler sang basura kag ang mga bag-ong haboy lang makolekta.
Nagpanawagan man ini nga kuntani mangin consistent ang pagkuha sang basura agud malikawan man ang pagtambak sini kasubong man ang mga masakit nga tuga sini bangud mas importante ang ikaayong lawas sang tawo kumparar sa negosyo.
