Natalana nga ilakip sang Department of Public Services (DPS) sa term of reference nga gamiton sa bidding process sa masunod nga garbage hauler sa syudad sang Bacolod ang performance sang garbage hauler.
Sa interview sang Bombo Radyo Bacolod kay DPS officer-in charge Ma Fe Tres Fuentes, igakonsiderar sa bidding process sa masunod nga garbage hauler sa syudad sang Bacolod ang track record sa garbage hauling kag performance sini.
Nahibaluan nga sang tinalikdan nga mga inadlaw madamo sang nabaton nga reklamo ang syudad angot sa mga wala nakolekta nga basura.
Sang Lunes kag Martes, ginpadulungan sang Bombo News Team ang bahin ang Margarita St sa Libertad Public Market kun sa diin ginahabuyan sang basura kag nakita nga may mga basura sang Disyembre pa ginhaboy kag wala gilayon makolekta.
Pila man ka semana ang pag-agunto sang mga nagarenta sang stalls sa nasambit nga dalan bangud nagkadunot na ini kag nadugangan pa sang pila ka adlaw nga nag-inulan tuga sang Low Pressure Area.
Suno kay Tres Fuentes, luyag ni Bacolod City Mayor Alfredo Benitez nga indi mangin reactionary ang garbage hauler sa mga problema sa basura.
Suno diri, nagakadapat ang ginasipot ang pagkolekta sang basura sa syudad kag indi na paghulaton nga may magpadangat pa sang reklamo.
Sa karun ginahingagaw sang DPS nga matapos ang term of reference kag ang IPM ang ginhatagan lamang sang extension tubtob sa Abril bilang garbage hauler sang syudad.
