Nagapanawagan ang isa ka member-consumer sang Central Negros Electric Cooperative sa IProcess 3CM Business Center nga bayaran kag isettle na ang ila mga bill sa CENECO sa madasig nga panahon agud masettle na ang ila mga accounts.
Sang Martes, nagpadulong sa estasyon sang Bombo Radyo agud nga magpangayo sang bulig ang kapin 34 ka mga residente sang Brgy. Handumanan kag Brgy. Felisa, Bacolod City matapos nautdan sila sang kuryente apisar nga sila ang nakabayad na sa IProcess 3CM Business Center, nga madugay na sang mga ini nga ginagamit agud magbayad sang bill sa CENECO.
Sa interview sang Bombo Radyo kay Cherryl Medina, isa sa mga tagreklamo, nagpromisa ang IProcess 3CM Business Center nga ila bayaran kag isettle sa CENECO ang mga bill sang mga konsumedor nga nagbayad paagi sa ila.
Suno kay Medina, ginpahayag sang business center nga sila ang magashoulder sang mga penalties kag gasto sa reconnection sang mga konsumedor.
Suno diri, may pila naman sa ila nga nakareconnect ukon nakabalik na ang kuryente apang kwestiyonable pa kun san-o mabalik ang ila ginbayad sang bulan sang Oktubre.
Suno kay Medina, napulo ka bulan na ini nga nagabayad sa paagi sa IProcess gani natingala ini kun ngaa ginbaton man sang CENECO ang ila mga payments apisar nga indi sila authorized nga payment center.
Nagapanawagan ang mga konsumedor sa IProcess nga atubangon nila ang ila responsibilidad kag indi pag-ipasa sa mga member-consumers ang kabudlayan bangud maskin pigado lang ang mga ini, ila ginatinguhaan nga makabayad on time.
Nagahingyo ini nga kuntani sabton nila ang ila ginhimo kag maclear na ang account sang mga pumuluyo.
