500 ka mga kapulisan ang gindeploy agud nga maghatag sang seguridad sa selebrasyon sang Bacolaodiat Festival sa siyudad sang Bacolod nga nagsugod subong nga hapon.
Sa interview sang Bombo Radyo kay Police Major Ritchie Gohee, station commander sang Bacolod Police Station 4, pagahiwaton ang Bacolaodiat Festival sa tatlo ka areas – ang Bacolod Government Center, Upper East Megaworld kag Yuantong Temple sa Burgos Street kun sa diin na-ekspektar nga madamo sang mga Chinese nga magapadulong nga ila naman ginbutangan sang 14 ka mga police officers bilang bantay kag seguridad sang tagsa ka site.
Suno diri, kahapon lamang nga may yara sila sang pre-deployment meeting kaupod ang Bureau of Fire Protection, Philippine Army, Bureau of Jail Management and Penology kag mga force multipliers.
Panugyan sini sa mga manugtambong amo nga kuntani indi magdala sang dako nga balor sang kwarta, mga alahas kag mag-aligmat sa palibot.
Lakip sa mga aktibidades sa festival ang parade, dance competition kag fireworks nga ginpreparar sang siyudad.
