Alas-4:30 subong nga hapon, siraduhon na ang dalan nagikan sa Burgos Street padulong sa Las Palmas para sa selebrasyon sang Bacolaodiat Festival sa Bacolod City Government Center.
Suno kay Police Major Junji Liba, pinuno sang Bacolod Traffic Authority Office, wala na sang salakyan nga makalabay sa nasambit nga lugar bangud mangin fully occupied ini sang parading participants.
Pagabuksan naman ang nasambit nga dalan kun matapos na ang parada.
Alas-4:00 sa hapon, ginapatuman ang truck ban kag sarang naman makalabay alas-9:00 sa gab-i.
Suno kay Liba, igaextend ang truck ban kun magutok pa gid ang dalan.
Suno sa BTAO head, amo man gihapon nga traffic plan ang igapatuman bwas sa hapon.
Suno kay Liba, 50 ka mga personnel sang BTAO ang nakadeploy sa Upper East kag sa Bacolod City Government Center agud nga maregulate ang traffic sa circumferential road, samtang ang seguridad naman sa palibot sang Upper East kag BCGC ang pangunahan sang Bacolod City Police Office kag Public Order and Safety Office.
Suno kay Liba, nakapatigayon na ini sang final briefing kahapon agud handa na ang mga ini para sa deployment, kaina ala-1:30 sa hapon.
Nagpanawagan ang BTAO head sa mga motorista nga magkooperar kag mangin pasensyoso sa pagbyahe ukon maglikaw sa nasambit nga dalan kun may yara sang iban nga sarang maagyan.
