Ginterminate sa trabaho ang traffic enforcer nga nag-ako nga nagbaton sang P50 nga suhol nagikan sa mag-asawa nga gindakop sini bangud wala nagasuksok sang helmet sang Bangga La Salle, Bacolod City, sang Enero 22.
Ini ang nakuhaan sang litrato kag video kag ginpost sang isa ka netizen sa social media.
Sa interview sang Bombo Radyo kay Police Major Junji Liba, pinuno sang Bacolod Traffic Authority Office (BTAO), sang Lunes, naglab-ot sa iya atensyon ang nasambit nga insidente kag iya ini gilayon nga ginpa-identify sa mga supervisors, ginpalocate kag iya ginpareport sa iya opisina.
Suno kay Liba, nag-ako ang nasambit nga traffic enforcer nga nagbaton gid man ini sang kwarta nagikan sa mag-asawa.
Suno diri, ginflag down sini ang mag-asawa nga nagasakay sa motorsiklo bangud wala sila nagasuksok sang helmet.
Samtang nagatransaksyon, nakit-an nga nagdaho ang violator sang kwarta sa enforcer nga suno diri, iya man ginbaton.
Duha ka mga enforcer ang nakit-an sa video apang suno kay Liba, wala sang kahilabtanan ang isa ka personnel.
Sa bahin naman sang nagbaton sang suhol, may yara ini sang liability bangud wala niya gin-apprehend ang violators gani siya ang ginterminate sa trabaho.
Aminado ang BTAO head nga nakabatyag ini sang kaluoy apang ang una nga tiyansa nga ginahatag sini sa mga personnel amu ang iya constant reminder sini sa paghimo sang ila trabaho sang maayo.
Nagpanugyan si Liba sa mga enforcers nga likawan ang indi maayo nga ginawi, indi mag-expect sang second chance kag palanggaon ang ila trabaho kun luyag nila magpabilin sa serbisyo.
