Patay ang isa ka 42 anyos nga sakay sa karo matapos mabungguan sang Isuzu truck sa Hacienda Bibiana, Barangay E. Lopez, Silay City, Negros Occidental kapin alas-5:30 kahapon sang aga.
Ang biktima ang ginkilala nga si Ceasar Jaena, 42 anyos, kasado kag residente sa Purok Sampaguita sang nasambitan nga Barangay.
Samtang ang suspetsado ang ginkilala naman nga si Rene Ramoran, 39 anyos, kasado kag residente sa San Jose 2, Barangay Capitan Ramon, Silay City, nga driver sang green nga Isuzu truck nga nakarehistro kay Ramiro Diosana.
Santo sa inisyal nga imbestigasyon sang Silay City Police Station, si Ramoran ang nagabyahe gikan sa Norte padulong sa Sur nga dereksyon sang aksidente sini nga mabungguan ang Bull Cart ukon Karo nga ginaguyod sang Karbaw kag ginasakyan ni Jaena.
Ginhingagaw naman dala sang nagresponder nga Disaster Risk Reduction and Management (DRRM) personnel ang biktima sa Teresita Lopez Jalandoni Provincial Hospital apang ini ang gindeklarar nga dead on arrival.
Samtang pilason man bangod sa aksidente ang karbaw.
Sa karun nakahunong ang suspetsado sa Silay City Police Station kag natalana pasakaan sang kaso nga Reckless Imprudence Resulting to Homecide, samtang yara naman sa kustodiya sang Barangay E. Lopez ang Isuzu truck.
